سياسة الخصوصية

آخر تحديث: 20 أكتوبر 2026

الصفحة دي بتشرح بكلام بسيط إيه البيانات اللي بتتحفظ لما تكلّم عيادة على واتساب وبيرد عليك المساعد الآلي قنديل، وليه، ولحد إمتى، وإزاي تشوفها أو تمسحها. وفي آخرها جزء للعيادات.

1. مين مسؤول عن بياناتك

• العيادة هي «المتحكم» في بياناتك (ده الاسم في قانون حماية البيانات الشخصية المصري رقم 151 لسنة 2020). هي اللي بتقرر بتحفظ إيه وليه، وهي اللي بتشوف مواعيدك ورسايلك.
• احنا «المعالج»: قنديل خدمة بيقدّمها عمرو محمد حسن (Amr Mohamed Hasan)، فرد مقيم في مصر، تحت اسم عمرو محمد حسن. بنشغّل المساعد الآلي لحساب العيادة وبتعليماتها، وبيننا وبينها اتفاق مكتوب، ومابنستخدمش بياناتك لأي غرض تاني.

2. بنحفظ إيه وليه

• مش بنسألك عن تشخيص أو أعراض. البوت مابيديش رأي طبي، وأي سؤال طبي بيتحوّل للعيادة. لو كتبت حاجة طبية بنفسك، بتفضل في رسايلك مع العيادة بس، ومابتتحفظش في الملاحظات.
• الصور والملفات (زي روشتة أو تحليل): البوت مابيفتحهاش، وبيحوّلها للسكرتيرة.
• رقمك مابيوصلش لخدمة الذكاء الاصطناعي. بتوصلها الرسالة وبيانات الحجز اللي محتاجها عشان يرد.
• مابنستخدمش بياناتك في إعلانات أو تسويق، ومابنبيعهاش، ومابنديهاش لحد غير اللي في القسم 4.

3. الموافقة

أول ما تكلّم العيادة، أول رد بيوصلك فيه الرسالة دي (العيادة ممكن تصيغها بكلامها):

أنا المساعد الآلي لـ{العيادة}. العيادة بتحفظ اسمك ورقمك ومواعيدك عشان تحجزلك وتفكرك بميعادك، ورسايلك هنا عشان نرد عليك. الرسايل بتعدي على شركات بتشغّل الخدمة (واتساب وخدمة ذكاء اصطناعي) وسيرفراتها ممكن تكون بره مصر، ومش بتتستخدم في حاجة غير خدمتك. لو عملنا بعدين تطبيق للمرضى، مش هننقل بيانات مواعيدك ليه غير لو وافقت إنت بنفسك. تقدر تمسح بياناتك في أي وقت: اكتب «امسح بياناتي».
التفاصيل: لينك الصفحة دي

لو موافق دوس [موافق] أو اكتب موافق.

• البوت مابيحجزلكش غير بعد ما توافق. بنسجل وقت موافقتك والنص اللي وافقت عليه.
• لو مش موافق، دوس «لأ، عايز حد يكلمني» والمحادثة بتتحوّل لحد من العيادة يكمّل معاك بنفسه.
• رسايلك بتتسجل من أول رسالة، حتى قبل الموافقة، عشان نقدر نرد عليك ونحوّلك للعيادة لو احتجت.
• لو العيادة حجزتلك بنفسها، أو كانت بتكلمك قبل كده على نفس الرقم، بتوصلك نفس الرسالة مرة واحدة عشان تعرف وتقدر تمسح بياناتك لو حبيت.

4. مين بيشوف بياناتك

• العيادة: الدكتور والسكرتيرة ومسؤولين العيادة.
• احنا: للدعم الفني وحل المشاكل بس، وكل مرة حد مننا بيفتح محادثة مريض بتتسجل.
• شركات بتشغّل الخدمة (بتعدي عليها بياناتك عشان الخدمة تشتغل، ومابتستخدمهاش لحسابها):

5. سيرفرات بره مصر

الشركات اللي فوق سيرفراتها بره مصر، فرسايلك بتتنقل لبره مصر عشان يترد عليها. ده بيحصل بموافقتك، ولمصلحتك (عشان تتحجزلك وتتفكّر بميعادك)، والبيانات مابتتستخدمش هناك في أي حاجة تانية.

6. بنحتفظ بيها قد إيه

7. حقوقك وإزاي تستخدمها

القانون بيديك الحقوق دي، وتقدر تستخدمها في أي وقت ومن غير مقابل:

• تشوف بياناتك: تعرف إيه المحفوظ عنك ومين شافه، وتاخد نسخة منه.
• تصحّحها: لو اسمك أو أي بيان غلط، قول للبوت أو للعيادة.
• تمسحها: اكتب امسح بياناتي في شات العيادة (التفاصيل تحت).
• تسحب موافقتك أو تعترض على أي استخدام لبياناتك.
• توقف التذكيرات والرسايل: اكتب متبعتليش والبوت مش هيبعتلك تذكيرات تاني.
• تشتكي لمركز حماية البيانات الشخصية في مصر، لو شايف إن حقك ماتحترمش.

إزاي تطلب: اكتب طلبك في شات العيادة على واتساب، أو ابعت إيميل لـamrmhassanwork@gmail.com ومعاه رقم الموبايل اللي بتكلّم منه العيادة واسم العيادة. هنرد عليك خلال أسبوع. ممكن نطلب منك تأكيد من نفس الرقم عشان نتأكد إنك صاحب البيانات.

لما تكتب «امسح بياناتي»

1. البوت بيسألك تأكّد، لأن المسح مابيترجعش.
2. بعد ما تأكّد: بنمسح اسمك ورسايلك وملاحظاتك وبيانات الحجز، وأي ميعاد جاي بيتلغي. لو عندك ميعاد قريب، العيادة ممكن تكلمك.
3. بيوصلك تأكيد إن المسح تم.
4. رقمك بنحتفظ بيه 30 يوم بس عشان التأكيد يوصلك، وبعدها بيتشال. المواعيد القديمة بتفضل أرقام في إحصائيات العيادة من غير اسم ولا رقم.
5. خلال 30 يوم بياناتك بتختفي كمان من النسخ الاحتياطية.

ده بيمسح اللي عندنا في الخدمة. ملفك الطبي في العيادة نفسها (لو موجود) مش جزء من الخدمة دي، واسأل العيادة عنه.

8. الحماية

• الرسايل والتسجيلات والسجلات الفنية متشفرة في قاعدة البيانات، والنسخ الاحتياطية متشفرة.
• كل عيادة منفصلة تماماً: مفيش عيادة تقدر تشوف بيانات عيادة تانية.
• أي دخول على محادثات المرضى من لوحة التحكم بيتسجل، ولوحة التحكم محمية بباسورد وكود تاني.
• سجلات التشغيل مابتحفظش نص رسايلك.
• لو حصل تسريب لا قدر الله، بنبلّغ العيادة خلال 24 ساعة، وبنساعدها تبلّغ مركز حماية البيانات خلال 72 ساعة، وبيتم إبلاغك زي ما القانون طالب.

9. لو عملنا تطبيق للمرضى

لو عملنا بعدين تطبيق أو خدمة للمرضى، مش هننقل بيانات مواعيدك ليها غير لو وافقت إنت بنفسك موافقة منفصلة. وأي رسايل تسويق (لو عيادة طلبتها) محتاجة موافقة منفصلة وتقدر توقفها في أي وقت.

10. للعيادات

• العيادة هي المتحكم واحنا المعالج. بنعالج بيانات المرضى لخدمة العيادة بس وبتعليماتها المكتوبة، في اتفاق بيتمضي يوم التأسيس ونسخة منه في سجلاتنا.
• بيانات مسؤولين العيادة: بنحفظ أسماء وأرقام الدكتور وصاحب العيادة والسكرتيرة اللي بيستخدموا رقم الإدارة، ورسايلهم معاه، وسجل بكل تعديل عملوه (مين، إمتى، القيمة القديمة والجديدة) عشان أي تعديل يترجع.
• الشات القديم: وقت الربط، العيادة تختار تسمح أو لأ إن البوت يقرا محادثات آخر 6 شهور تقريباً عشان يعرف مرضاها. ده بيستخدم للعيادة دي بس، والعيادة تقدر ترفضه.
• المزوّدين: العيادة موافقة على الشركات في القسم 4، وبنبلّغها قبل أي تغيير فيهم.
• مدة الاحتفاظ بالرسايل 12 شهر إلا لو العيادة طلبت غير كده.
• لو العيادة وقفت الخدمة: بنسلّمها نسخة من بياناتها لو طلبت، وبنمسحها خلال 30 يوم ونبلّغها إنها اتمسحت.
• لينك الصفحة دي بيتحط في رسالة الموافقة اللي بتتبعت للمرضى.

11. التواصل والتغييرات

لأي سؤال أو طلب عن البيانات: amrmhassanwork@gmail.com، أو واتساب +201147497502. ولو عندك سؤال عن ملفك في العيادة، كلّم العيادة نفسها.

لو غيّرنا حاجة مهمة في السياسة دي، بنحدّث التاريخ اللي فوق ونبلّغ العيادات قبلها.